無kn̂g文化相拄會生出新ê聲。 福爾摩沙四重奏 tuì 2002年成立開始，就是以「迒文化ê聲」迵世界出名。這擺準備ê「美國鏡。台灣聲」，就是tuì美洲kàu台灣ê聲旅行，共美國當代文化當tsò鏡，共台灣土地當tsò厝，是展現身份佮記誌，嘛有文化互動的故事。 這擺音樂會的曲攏有伊ê意義佮趣味，會當呈現美國音樂文化ê濟面向。包括有探討身份認同ê《講》、美國南方種族議題ê《八分之一烏人血統ê舞會》、移民經驗ê Dvořák（德弗札克）作品《美國》閣有Jazz 音樂《 Rachel ê 夢》kah 《我掠有節奏》。當然嘛會kah觀眾分享1950 kàu 1960年代台灣戰後經典歌謠。包括有改編自洪一峰《淡水暮色》、陳達儒 kah 蘇桐《青春悲喜曲》 ê Hayakawa Masaaki （早川正昭）作品，閣有林道生 ê 《賞月舞》。遮-- ê旋律毋但有足厚 ê 時代感，嘛攏是台灣人生活的記持 kah 感情。 福爾摩沙四重奏是由四位美國籍台灣囝孫ê音樂家創立。2006年著tio̍h倫敦國際弦樂四重奏大賽首獎 kah A-má-tiù-sū（Amadeus）獎，是頭一个著tio̍h這個光榮ê亞洲弦樂四重奏樂團。樂團長年以來以台灣多元 ê 音樂元素tsò怹ê靈感，委託製作真濟新作品--出來tī世界巡演。怹 ê 演奏毋但予人感受會tio̍h音樂ê氣勢，嘛感受會tio̍h藝術ê幼路。毋管是演奏經典ê、當代ê、Jazz ê 抑是民謠，Formosa四重奏除了會當予觀眾耳空內換新去舊ê體驗，嘛予咱看著怹這幾年來成果有偌呢豐富，台灣文化 ê 特別 kah 活跳攏予怹用音樂表現出來矣。 演出人員： 小提琴｜林允白 (Jasmine Lin) 小提琴｜David Bernat 中提琴｜Matthew Cohen 大提琴｜Deborah Pae 演出曲目： Shelley Washington：《講》 組曲：《tuì美洲kàu台灣》 －Dvořák (德弗札克)：F 大調第十二號弦樂四重奏《美國》，作品96，第二樂章：緩板 －Goodman：〈Rachel ê 夢〉 －Gershwin (蓋希文)：〈我掠有節奏〉 －葉俊麟詞，洪㇐峰曲：《淡水暮色》早川正昭改編 －林道生：《賞月舞》 －陳達儒詞，蘇桐曲：《青春悲喜曲》早川正昭改編 Wynton Marsalis：第㇐號絃樂四重奏《八分之一烏人血統ê舞會》 Shelley Washington: SAY Set: America to Taiwan Antonín Dvořák: String Quartet No. 12 in F Major, Op. 96 "American" , II. Lento Benny Goodman: Rachel's Dream George Gershwin: I Got Rhythm arr. Hayakawa Masaaki: Joys and Sorrows of Youth Daw-Sheng Lin: Moon Dance arr. Hayakawa Masaaki: Twilight on the Tamsui River Wynton Marsalis: String Quartet No. 1, "At the Octoroon Balls"